Alexandra & Moritz in Costa Rica travel blog

Badi

Ingenieur


Mit La Fortuna hämmer unser Hauptquartier zum erschte Mool im ere veritable Tourischte-Hochburg ufgschlage. Die Plätz umschiffe mer sunscht, aber au jetz isch es nit so schlimm wie s dönt, do nit Saison isch. Zuedäm git s do e vyylfältig Agebott an Aktivitäte in der Natur, sofärn me nit wasserschych isch. So simer denn au nach eme intensive Morge pflutterpflätternass wider im Hotel glandet. D Alexandra isch drum im gröschte Schiff hoch zu Ross underwägs gsi und het d Gegend um e Vulkan unsicher gmacht. Y mues do nomol betone, ass das zwoor immer mool wiider (dasch jetzt schön usdruggt gsi ;-)) saicht, ass es aber nit wirgglig störend isch; es isch vylmee e konstanti warmi Duschi. Y bi in der glyyche Zyt mit e paarne vo der Gruppe go e verlorene Cañon erkunde, e schmali ängi Schlucht mit eme glaine Sturzbach. Abgsicheret an Sail und unter fachkundiger Awysig verbringt me guet 2 Stund dermit, ai Schlappe nonem andere z zieh, in unschynbare Glungge plötzlig komplett under Wasser z stoh oder us öppe 50 Meter über eme Wasserfall am ene Sail ins Tal z rutsche. Sogar der Chuck Norris het sich das zwai Mool überlegt ;-) Sälbschtverständlig erwartet aim als Belohnig e gallo pinto! E guete!

Der Räscht vom Daag verbringe mir in der Stadt bim Souvenir-Shopping bevor s jetz denn nomol zu Hot Springs goht. Das Mool isch es nit e Baad, wo sich s fascht lavawarme Wasser zu nutze macht, sondern es sin naturbelasseni Badetümpel. E Ghaimtipp under de Yhaimische und y bi gspanne, was ys dört erwartet. Hasta luego!

Moritz

Dasch übrigens s Hot-Springs-Badeland, wo mer vorgescht gsi sin! Der Arenal stoht brav als Kulisse näbedra!

PS: Und fir die wo s intressiert jetz no paar gsammleti Ydrügg vo Land und Lyt: Der Durchschnitts-Tico – Tico isch quasi der Bebbi vo Costa Rica – verschlingt überdurchschnittlig vyyl Ryys mit Bohne. Zum Zmorge, Znüni, Zmidaag, Zvieri, Znacht, es landet gallo pinto uf em Disch. Derzue git s e Würzsosse vo Lizano, wo überall uf em Tisch stoot, und e Tabasco-Sosse. Im Wytere ghört är zu de wältwyt zfriidenschte (git s das Wort?) Mensche, het zwai Fiess und zwai Händ. Die brucht er au, denn är het au e Gländewaage, was y ihm au empfähle wurd. S WC-Papier entsorgt er nach Gebruch im Mischtkübel und är bringt sy Lohn in Form vo Colones haim. 500 dervo entspricht eppen 1 Dollar, was se aber nit dervo abhaltet, au 1-Colón-Münze härzstelle (woby die aigedlig nimme im Umlauf sin; friehner het s sogar 25 Céntimos gä). S herrscht e bunte Mix an Hutfarbe, me drifft alles erdängglige aa (Usnahme sin Blau, Mandarin und Mauve). D Strosse sin nit in däm guete Zuestand, wie mir das kenne, aber s isch alles und überall suuber, Abfall landet schön trennt im Mischtkübel und nit uf der Stross. Au an de sanitäre Aalaage könnte sich bi uns e paar e Vorbild nä! D Distanz zwische Wasserstrahl und Lavaborand erraicht zwor nit der Schwyzer Standard, isch aber mindischtens dopplet so gross wie im Verainigte Königryych! Die Architekte, wo me bi uns in s Exil schiggt, gwährt me do Asyl. Wäge grossartiger Baukunscht mues me nit do aane, vyl isch unfertig und beläschtigt d Netzhut. Ainewäg het s hüffig sy aigene Charme, und suber und pflägt isch es sowiso. Verspürt der Tico Hunger, goht er in e Soda, die typische Baizli. Wänd sin überbewärtet! Dangg warmem Klima gniesst me s Ässe aifach uf eren Art Veranda, e paar Pföschte und e Dach länge, fertig isch e typisch Soda. Charmvoll usgstattet sitzt me also immer an der frische Luft. Ainewäg isch alles strikt rauchfrei, was au kai Problem isch, do kuum e Tico raucht. Wenn s im T. J. us B. Denn z Basel langwyylig wird, kaner d Lyt also dört go terrorisiere, wo der Pfäffer waggst. Das isch nämmlig do! Überleget s eich also, bevor ihr öpper ins Pfäfferland winschet; s isch nämmlig winderschön! :-) Näbe Pfäffer gseht me e Huffe Ananas-, Banane- und Palme-Plantage. Näbem gallo pinto isst me hüffi Plátanos, die griene Kochbanane, Yucca, sowie Palmhärze und vyyl spanisch-mexikanisch aghuuchts wie Burritos, Tacos, Empanadas oder Quesadillas, dringgt Imperial-Bier oder allergattig Frichtsäft mit Wasser oder Milch (Guave, Tamarinde, Guanabana …). Wasser ka me ab em Hahne dringge (mit wenige Usnahme wie Tortuguero oder Puerto Viejo). Ässe isch kai Problem, me ka alles bedänggelos bstelle. S ainzige, wo fählt, isch wiirgglig Wurschtsalat! :-) Pura vida!

SUVA bitte wägluege! Tico bi der Arbet! Wenn das numme guet kunnt!



Advertisement
OperationEyesight.com
Entry Rating:     Why ratings?
Please Rate:  
Thank you for voting!
Share |