Alexandra & Moritz in Costa Rica travel blog

Pano 1

Forest1

Forest2

Forest3

Forest4

Forest5

Pano2

Pano3

Forest6

Forest7

Snack

Wasserfall

Leider geil

La Fortuna


E Wolkering um e Gipfel vor blauem Himmel, das mues der Arenal sy! Mir sin geschter also im wunzige Stedtli La Fortuna diräggt am Fuess vo däm Vulkan akoo und gniesse vom Hotelzimmer us e grandiose Blick druf. Är isch numme um die 7000 Joor alt und ain vo de aktivschte vo der Wält, isch aber syt öppe 2 Joor zimmlig ruhig, so ass mer kaini Fyyrspiil beobachte könne. 1968 het är aber mächtig Dampf abgloo und derby zwai Dörfli zerstört, also me ka nit sage, ass es numme haissi Luft syg.

La Fortuna.

Mir erfahre die Kräft Arenal uf e agnähmeri Art und Wyys: In sogenannte Hot Springs löhmer der Daag usklinge; e wunderbar gstalteti Pool-Landschaft mit Wasser, wo vom Vulkan uf agnähmi, (zue) warmi 32 Grad erwärmt wird, ladet zum verwyle an der Poolbar yy. Dangg in der Fruchtschale servierte Piña Colada und Coco Loco nimmt s Eländ sy Lauf und losst sich au nimme ufhalte.

Vo sovyl Welness simmer zimftig uf de Felge und sin nit emool dur en Ärdbebe – s zwaite übrigens syt mer do sin – verwache.

Am andere Daag goht s uf Wanderschaft uf e Cerro Chato. Das isch der glai Brueder vom Arenal, wo nimme aktiv isch und in sym Krater e wunderbare Badesee zur verfiegig stellt. E Bligg us em Fänschter zaigt – nenne mer s mool überdriibe hochi Luftfiechtigkait, also nyt Neus und mer löhn ys nit ufhalte. Übersetzt haisst Cerro Chato öppe «flache Gipfel» und me het s Gfiehl ass ys d Tukan bim Ufstiig mit ere grosse Portion Sarkasmus uslache; s isch nämmlig alles andere als flach, und unser Schwyzer Bärgbluet kenne mer guet bruuche. Bald erraiche mer der Näbelwald, wo sich um e Krater umme befindet. Was für e mystischi Määrlilandschaft! Au wenn kai Bild die paggendi Stimmig vo de mit Moos, Farn und Epiphyte bewaggsene Bäum im Näbelmeer ka authentisch widergä, do ainewäg e paar Yydrügg:

Kratersee uf em «flache Gipfel».

Gemäss em uralte Wirz finde mir s in däm Wald baimig, aber nodäm mer no in Krater zum See aabekragslet sin, isch s au scho Zyt fir der Ruggwäg und en Abstächer zum La Fortuna Wasserfall. Us 70 Meter donneret s Wasser in e Naturswimmingpool; also ab in d Badhose und gniesse.

Zerscht e Snack – mer hän zu dritt alles belzt! – …

… denn en Erfrischig!

Zrugg und drogge (das darf me mol erwähne, s kunnt jo nit allzu oft vor) goht s uf e Bummel dur s pittoresk Stedtli. Aimool me isch d Formle bewiise: «costaricanische Frappuccino + Crêpes mit Dulce de Leche = unändlig vyl Kalorie aber ‹pura vida› und leider geil!»

Leider geil!

Ufmerksami Läser wärde sich jetz wundere, wo der gallo pinto hüt bliiben isch? Hüt hämmer en tatsächlig souverän umschifft, denn au zum Znacht in der «Lava Lounge» hämmer en fir aimool nit adroffe … leider aber au kai Wurschtsalat!

Moritz



Advertisement
OperationEyesight.com
Entry Rating:     Why ratings?
Please Rate:  
Thank you for voting!
Share |