Alexandra & Moritz in Costa Rica travel blog

Spinne 1

Frosch 1

Spinne 2

Fiess

Frosch 2

Mantis

Näscht

Dickicht

Proscht

Blue Jeans

Lodge

Jacuzzi


Es isch nit so, ass me ime Räägewald aaduurende Sunneschyn erwarte wurd, aber ime Land, wo sich «ryychi Küschte» nennt, miesst me doch naime Wurschtsalat könne uffdryybe! Aber so beraite mer ys halt traditionell mit gallo pinto uf e lange Raisedaag vor. 2 Stunde per Boot, 4 Stunde per Glaibus (inkl. Shopping-Halt, womer zwische Santigläus und Schneemänner s Nötigscht bsorgt hänn), denn e Lunchstopp imene Kolibri- und Schmätterlingsparadyys, wo mer s ganze Gstelasch uf e Traktorahänger – stelled Eich e Waggiswaage aber Papaya statt Orange vor – verlade hän. So isch es denn über e Buggelpischte (FIS-Skala: pächschwarz) und zwei Flussdurchquerige richtig Nirgendwo gange! Zwei Stund spöter simmer ändlig am Arsch vo der Wält akoo (ok, nit grad diräggt, aber me het en vo dört wunderbar gsee!). Spass uf s Velo: Mir sin so abgschiide wie s numme goht in der Magsasay-Lodge zmitz im Sarapiquí-Rägewald, wo vo sehr härzlige Lyt gfiehrt wird.

Blick vo der Terrasse, me gseht e Huffe Tukan!

Do s scho 5i isch, wird s au scho dunggel, und nach eme feine gallo pinto, wo der Wäg anschynend wiirgglig bis in die hinderschte costaricanische Winggel gfunde het, goht s beraits uf ere Nachtwanderig dur e Rägewald, wo ryych an Frösch und de schönschte Insäkte und Spinnen isch! Au e Koralleschlang isch ys über e Wäg gloffe, äh kroche, schwarz, rot und wyss gringlet (man merke: red and black = friend of Jack; red and yellow = deadly fellow). Löhmer doch Bilder spräche:

Am andere Daag gohts am 6i demorge uf e Wanderig. Drby gsehmer, was me alles an Medizin und Nahrig im Dickicht findet, zum im Notfall z überläbe. E Machete macht us ere Liane e Wasserhahn, divärsi Pflanze könne mer vergnusswurschtle (woby sich s lohnt z wisse, weeli me darf und weeli nit) oder si wirgge als Repelens gege Moskitos (s hilft wiirgglig) oder me ka ryssfeschti Strigg druss baschle. Vom ässbare Frosch hämmer trotz ufkeimendem Haisshunger ainewäg nit probiert. Grieni Aras beglaite uns uf em Wäg!

Dä Baum isch voller kunschtvoll gflochtene Vogelnäschter.

Irgendwie schloht me sich dur s Dickicht.

Proscht!

Ass das Wisse wiirgglig nützlig isch, zaigen ys zwai Waggis, womer bi der Afahrt underwägs droffe hän, im Dickicht «complètement perdus» und weder Spanisch no Änglisch im Ruggsagg derbyy. Mr hännene übrigens könne wyterhälfe.

Zrugg und gstärggt mit gallo pinto zem Zmorge gohts uf e Froschtour. Der ainzig, womer gse hän – bi Tagesliecht isch das paradoxerwys schwiirig – isch dä Kärli, villicht findet ihr uuse, worum me ihn «bluejeans frog» nennt ;-)

E Bad in der Maggia – so ähnlig gseht s jedefalls uus, rundet s Erläbnisprogramm bi Sunneschyn ab. E natierlige Jacuzzi quasi! :-)

D Daisy, d Pächtere vo der Lodge, het ys denn zaigt, wie me Tamales macht: In Bananeblätter kunschtvoll verpaggt, isch das en Art Polänta mit Riebli, Härdöpfel, Sau und Ryys aber ohni Bohne!!! Der Inhalt vo däm Päggli soll denn am andere Daag als Zmorge diene, nodäm s vorhär dämpft worden isch. Znacht isch s nomol in Dschungel gange, und do hämer sogar no e Tarantlen aadroffe!

Nach eme erholsame Penn, womer aaneblätteret hän, isch s am nägschte Morge hoch zu Ross wider d Buggelpischte retour gange. S Lasso hämmer nit usegholt, aber ansunschte simmer im flotte Trab über d «Strooss» gsprunge. Und zrugg in der Zivilisation springe d Kinder us de wiehnächtlig dekorierte Hüser für e Winggilisgg uf d Stross oder warte uf e Schuelbus! Ah jo, das erinneret aim dra, ass jo Mäntig isch! ;-) Au wenn der Wegger bis jetzt zu de ungwöhnligschte Zytte mues sy Uffgoob wohr nä, isch alles sehr erläbnisrych und zum gniesse! Pura Vida!

Im Momänt simmer uf em Wääg in s Vulkangebiet vom El Arenal. Ob s dört ächt Wurschtsalat stattt gallo pinto git? Mr blybe dra!

Moritz



Advertisement
OperationEyesight.com
Entry Rating:     Why ratings?
Please Rate:  
Thank you for voting!
Share |