Alexandra & Moritz in Costa Rica travel blog

Recycling

Dschungel

Fotograf

Kanu

Kaiman 2

Baby

Movie Clips - Playback Requirements - Problems?

(MP4 - 6.74 MB)

Baby


Während der Nacht het ys s verreinigte Zirp- und Pfyfforchester mit ihrem neischte Wärk (Opus #12, «Kakophonia Arthropoda) prächtig unterhalte, ergänzt dur e perfäkt abgstimmti Choreographie vo de Illuminationskünschtler «Glieh und Würmli»! In d Nacht schmättered der Wegger no vor em 4i clock sy unbarmhärzige Ruef. Hüt isch nämmlig e grosse Daag und s git drum au nomol bitz mee zum Lääse!

Sprochgewandti Sherlocks under Eich wärde der Namme Tortuguero villicht scho richtig ygordnet ha. Der Strand isch beriehmt als Laichplatz vo Meeresschildkrote. D Babys schlüpfe in der Nacht oder am Morge. Mir übersetze also mit em Bötli in s Dörfli und laufe die paar Meeter an Strand. In der Dämmerig laufe mr der Strand ab, vor Uffregig merkt me gar nit wie wyt! S goht nämmlig e Zyttli, bis mer en erscht Mool fündig wärde (de Spure im Sand noch isch der Jaguar scho vorhär do gsi). Denn dräffe mr aber uf e explodierend Näscht: unzähligi Suppeschildkrote-Babys kraxle us em Sand und styre zyylgrichtet richtig Brandig. Es isch yydrügglig z gsee, wie asträngend dä Wäg für die Babys sy mues, und wie s im Wasser usgseht, hämmer jo gescht scho besproche! So wird au numme öppe jedi 1000schti an dä Strand zruggkehre! Aber luege mer doch die erschte Sekunde vome Schildkroteläbe zämmen aa:

Geier sin als erschts bim ene schlüpfende Näscht zur Stell und hälfen ys so, die nägscht Attraktion z entdegge! Es kunnt e ganzi Armee vo Schildkrotebabays richtig Meer agstürmt und dangg unserer Präsenz schaffe si s au Problemlos an der Geierbarrie vrby!

Bald hesch s gschaft!

Nach der Schildkrote-Fotijagd!

Am achti goht s denn per Kanu in s Flusslabyrinth. Uf die Art schafft me s, so noch wie numme möglig in Kontakt mit der Fauna z drätte: Brüllaffe begriessen ys us sicherer Distanz mit ohrebetäubendem – richtig – Gebrüll! Ob die glaine Bursche au so der Max wurde mache, wenn me diräkt vor ene stoht und ene der Menüvorschlag fir s Znacht präsentiere wurd, waiss y nit (zuegä: nach de beriehrende Erläbnis im Rescue-Center, kämt me sich denn sowiso bitz anthropophag vor). Kaiman drifft me um jede Eggen aa, und sälbscht us eme halbe Meter (sic!) Distanz löhn si sich nit us der Rueh bringe. Für Basel intressant isch der Basilisk. Ob dä, wo mer adräffe, au us eme Hahn-Ei gschlüpft isch, und dä Hahn sich im Dickicht vom Dschungel vorem Scharfrichter verstegge mues, entzieht sich unserer Kenntnis (http://www.basilisk-basel.ch/index-Dateien/Page487.htm). Über s Wasser lauft er uf jede Fall wien e Grosse! S isch unglaublig, was unsere Guide alles erspäht, wil sämtligi Dier sin so guet tarnt, ass si no sueche miesstisch, wenn si Dir uf der Nase hogge. Do paar Impressione bi super Wätter:

Per Kanu dure Dachungel.

E Kaiman, oder besser zwei!

Nomol ain!

Tropfnass hogge mr im Kanu uf em Ruggwäg! D Rägezyt het sich in ihrer Agonie entschiide, s sichere Ändi nomol mit em volle Repertoire an Rägeschlachte z vermyyde. Isch zwor ussichtslos, macht ys aber ainewäg nass! Mr machen ys am Nommidaag trotzdäm no uf der kurz Rundwäg im Nationalpark uf. Gummistiifel sin Pflicht, Diethyltoluamid empfählenswärt (Moskitos sin nit wassyerschych!). Uf der Ameiseautibahn herrscht dört Hochbetriib, Schwertransporter mit abgschnittene Blattstüggli und ganze Bliete sin underwägs! Riisigi Bananespinne und Halloweenkrabbe (die haisst wirklig so), könne nit drüber hinwägdüsche, ass au z Tortuguero Halloween verby isch und langsam Wiehnachtsgirlande zwische de Kokospalme an Maa brocht wärde (aber: letztes Jahr war mehr Lametta!). Glychzyttig macht d Schielerband wider Rambazamba!

Manati-Hiwyysschild z Tortuguero; im Hintergrund aini vo de zahlryche Recyclingstatione.

Schlussändlig löhmer ys vome Boot zrugg zum Hotel chauffiere. Der Livemusiker het s dangg de Rägefäll nit do ane gschaft und so lauft zum e feine Znacht (gallo pinto!!!) Muusik an der Bar, diräkt us em Youtube! Wenn das d Suisa wisst!

Morn isch e lange Daag, wo ys no diefer in Dschungel fiehrt. Mir wärde die folgende Dääg im Sarapiquí-Reservat verbringe und komplett vo der Ussewält abgschnitte sy! Nägschti Updates git s also erscht in e paar Dääg :-)

Moritz



Advertisement
OperationEyesight.com
Entry Rating:     Why ratings?
Please Rate:  
Thank you for voting!
Share |